يا عيون بابا

الوحدة: 1- 6- 2020

 

يا عيون  بابا، و نور عينيّا

وعيون أمها.. وشمسها وفيّا

كل الأهل حبوك  والخلان

اسمك (ماريا) منوّر وحليان

لطف

وحلاوة

خدود ورديةْ

×××

متل الزهر يفوح بالبستانْ

وجه القمرْ

ومزهّر برمّان…

وأنا،

أنا، بيّك بحبّك جانن وولهان

بقلك قصيدة

من حبق..  ريحان

وأنت،

أنت، حكاية بحب إحكيّا

أنت، صلاة  بحب إدعيّا

اسمك قصيدة بحب غنيّا

تبدا بسورية وتختم بلبنان

وتعلى…

تعلى لصوب الشمس… ارويّا

×××

يا ضحكة البيت

يا فْراشة

يا مزنّرة

ومحوّطة

بماسة

الله عطاكِ، وخد ألماسي

بحْمدو كل ليل..  كل نهارْ

أنت، موسيقى

وعطر

مع جلنار

بحطّك بعيني..  وتاج ع راسي

×××

يا ريحتك من نعم الله

بالله منين هالحلا بالله؟

وخدود.. والعنقود.. ما شا الله

بحبّك يا بابا..   بحبّك، وْ: الله

عسلات أنتِ بشهدو  ومحلّا

ولحظة بلحظة كتير تتحلّا..

وبكل خطوة بعيد: ما شا الله

×××

متل  الطفل بيّك ع هالشطآن

يهجّي اسمك

يلون  الحيطانْ

يكتب بحبك

يا: (ماريا).

باسم عباس